Advertisements

Shirkii Madasha Wada-tashiga Qaranka oo laga soo Saaray War-murtiyeed !!!!!

Shirkii Madasha Qaranka.jpg2Shirkii Madasha Wada-tashiga Qaranka ee Doorashada Somalia ee Sannadkan 2016-ka, kaasoo muddo Toddobaad ah ka socday Xarunta Madaxtooyada Somalia ee Magaalada Muqdisho, ayaa goor-dhaweyd la soo gaba-gabeeyay. HOOS KA DAAWO SAWIRRO KALE.

Shirkii Madasha QarankaShirkan oo ay ka qayb-galayeen Madaxda Sare ee Dalka iyo kuwa Maamul-goboleedyada, ayaa markii hore loo qorsheeyay inuu socdo laba maalmood, balse waxaa ku yimid xiritaankiisa dib u dhac, kaddib Hoggaamiyeayasha ka qayb-galaya ay isku qabsadeen qodobbadii looga dooday qaarkood.

Shirkan ayaa waxaa laga soo Saaray War-murtiyeed, wuxuuna u qornaa sidatan:

  1. Muddada Xil-heynta Laamaha Dowladda Federaalka Soomaliya.

Madasha Hoggaanka Qaran ka dib markii ay aragtay jedwalka hirgelinta doorashada 2016 ee ay soo gudbiyeen Guddiga Federaalka Hirgelinta Doorashooyinka Dadban (GFHDD), isla markaana arkeen Qodobka 91-aad ee Dastuurka Federaalka ee Qeexaya in laamaha Dowladda Federaalka Somalia ee Jamhuuriyaddu ay ku kooban tahay afar (4) sano oo ka bilaabanta maalinta xilka loo dhaariyay, maankana ku haya in duruufaha jira awgeed ayan suuragal ahayn in doorasho la qabto inta ka harsan muddada xilheynta ee laamaha dawladda ee hadda jira (Baarlamanka Federaalka iyo Madaxweynaha). Madashu waxa ay tixgeliyeen in ay lagama-maarmaan tahay in muddada gaaban ee kala guurka ah looga gudbo si huwan nabaadiino iyo xasillooni, aysan dhicin firaaq hay’adeed ku yimaada jiritaanka Laamaha Dastuuriga ah ee Dowladda Federaalka. Madashu waxay Guddoomisay in laga billaabo Taariikhda ay ku dhammaaneyso muddada xil-heynta laamaha dawladda, ay xilka u sii hayn doonaan ilaa iyo inta natiijada cusub ee doorashada ee laamaha dastuuriga ah lagu dhawaaqo, sida ku cad jadwelka ay soo saareen (GFHDD).

  1. Dhammeystirka Dib-u-Eegista Dastuurka

Madashu waxaa ay si wadjir ah u bogaadinayaan Guddiga dib u eegista dastuurka ee Baarlamaanka federaalka, Guddiga Madaxa Bannaan ee dib u eegista dastuurka iyo Wasaaradda dastuurka shaqada wanaagsan ee ka soo qabteen dib u eegista dastuurka , waxa ay soo jeedineysaa in ay lagama-maarmaan tahay in howlaha dib-u-eegista dastuurka ee qabyada ah uu dhameystiro Baarlamaanka 10naad ee Jamhuuriyadda Federaalka Soomaaliya ee dhawaan la dooran doono, isla markaana uu tixgelin iyo mudnaanta koowaadba siiyo Qaraarka iyo lifaaqyada uu Baarlamaanka 9aad ku ansaxiyey kalfadhigiisa 8aad ee 2016.

  1. Adeegsiga Nidaamka Awood-qaybsiga 4.5 oo looga Gudbo Dhisidda iyo Hirgelinta Axsaabta Siyaasadeed;

Madashu waxaa ay soo dhaweynayaan mabda’a dimoqraadiga ah ee suurtogalinaya in shacbigu helo fursad uu madaxdiisa si caadil ah ugu kala doorto barnaamijyo siyaasadeed oo ay ku kala tartamayaan axsaab siyaasadeed taasoo ah dariiqa ugu habboon ay Soomaaliya uga bixi karto nidaamka doorashooyinka ku saleysan 4.5 ee lagu soo meelgaaray. Sidaa darteed, Madaxda Madasha Qaranku waxaa ay isku raaceen in la horumariyo dhisidda iyo diiwaangelinta axsaabta siyaasadeed muddo labo sano gudahood ah, ka bilaabata taariikhda la doorto Baarlamaanka 10aad. Haddaba si arrintan loo hirgeliyo qof kasta oo Musharrax ah, oo u tartamaya kuraasta labada aqal ee Baarlamaanka Federaalka midkood waxaa laga doonayaa inuu saxiixo afti qoraal ah oo uu ku caddeynayo in uu labo (2) sano gudahood, ka bilaabata maalinta la dhaariyo Baarlamaanka 10aad uu xubin ka noqonayo mid ka mid ah axsaabta siyaasadeed ee sharci ahaan dalka ugu sameysmay, Baarlamaankana ku matali doono xisbigiisa. Xildhibaanada ku guuleysta doorashooyinka ee aqalada Baarlamaanka ee Soomaaliya ay ka mid noqon doonaan axsaabta siyaasadeed ugu dambeyn 20ka Oktoober 2018. waxaa laga doonayaa in xafiiska Guddoonka Baarlamaanka geeyo caddeyn xisbiga siyaasadeed uu xildhibaanku xubinta ka yahay, Golahana ku matalaayo. Xildhibaankii ku biiri waaya xisbi siyaasadeed muddadaas ka dib waxey sababeysaa xil-waayid xubinimada golaha Xildhibaanku ka tirsan yahay, kursigaasna doorasho loo diro.

  1. Arrimaha khuseeya Guddiyada Doorashada:
  2. Madashu waxay dhameystirtay, magacyada xubnaha Guddiyada Doorashada ee heer Dawlad Goboleed (GDHGDG).
  3. Madashu waxay soo saartay tirada iyo magacayada xubnaha guddiga khilaafaadka, waxayna ka dhigtay tirada 21 xubnood halka ay markii hore ka aheyd 11 xubnood. Sagaal (9) ka mid ah guddiga waxaa soo magacaabeysa Dowladda federaalka ah, halka ay min laba (2) xubnood soo magacaabayaan Dowladaha xubnaha ka ah ama ka mid noqon doona Dowladda Federaalka ah.
  4. Madashu waxaa ay go’aamisay in xarun walba oo doorasho la geeyo 3 xubnood oo guddiga xallinta khilaafaadka ah waxayna ku go’aan qaadanayaan cod hal dheeri ah.
  5. Madashu waxa ay go’aamisay in ciddi cabasha qabta oo u gudbaya guddiga xallinta khilaafaadka la furi karo oo kaliya marka qofka cabashada qaba bixiyo khidmadda furidda gal-dacwadeedka $1,000 (kun oo doolar).
  6. Arrimaha Haweenka Musharixiinta ah ee u Tartamaya Labada Aqal;
  7. Sidoo kale, waxay madashu ku adkeynaysaa odayaasha dhaqanka iyo guddiyada doorashada inay xaqiijiyaan arrimaha soo socda:
  8. Xubnaha Xildhibaanada Golaha Shacabka ee la doortay, 30% waa in ay ahaadaan haween .
  9. Afarta beelood, beeshiiba haweenka la doortay waa in ay noqdaan 18 xubnood (4X18=72).
  10. Beesha shanaad, haweenka la doortay waa in ay noqdaan sagaal (9) xubnood.
  11. Si sare loogu qaado fursadaha haweenka ee doorashada 2016, madashu waxa ay go’aansatay in khidmadaha murashaxnimo ee haweenka hoos loo dhigo 50%, si loo dhiirrigeliyo taabbagelinta qoondada haweenka ee Baarlamaanka Federaalka

    F. Ergada doorashada ee beel walba oo ah 51 xubnood, ugu yaraan 30% waa in ay noqdaan haween.

    G. Xubnaha loo soo sharaxayo aqalka sare, 50% waa in ay noqdaan haween.

  12. Arrimaha Beesha Banaadiriga;
  13. Ra’iisal Wasaaraha Xukuumadda Federalka, isagoo la tashanaaya odey dhaqameedyada beelaha Banaadiriga ee ku jira liiska 135ta oday dhaqameed iyo nabad-doonnada beesha, waxaa uu soo magacaabayaa afarta (4) xubnood oo ah guddiga doorashada ee beesha Banaadiriga
  14. Seddexda (3) Oday dhaqameedyada Banaadiriga ee ku jira liiska 135ta oday, iyagoo la tashanaaya Raisul Wasaaraha Xukuumadda iyo Guddiga Doorashada beesha Banaadiriga, waxa ay soo xulaayaan 21 Ergo-doorasho oo ku saleysan toddobo beel hoosaad oo min saddex xubnood ah (7X3=21).
  15. Ergada-doorasho ee ah 21 xubnood ayaa u codeynaaya musharixiinta u tartamaaya in ay ka mid noqdaan Aqalka Sare.
  16. Odayaasha dhaqanka Beesha Banaadiriga ee ku jira liiska 135ta xubnood oo la tashanaya nabadoonnada beelaha Banaadiriga ah ayaa soo magaacabaya musharixiinta u tartameysa Aqalka Sare.
  17. Ugu dambeyn waxaa Odayaasha dhaqanka loo xilsaaray inay qaybinta kuraastaasi ka soo wadatashadaan meelmarinta kama dambeysta ahna ku soo wargeliyaan R/Wasaaraha Xukuumadda Federaalka Soomaaliya.
  18. Shuruudaha Codeynta;
  19. Doorashada halkii kursi ee Golaha Shacabka waxaa ay ansaxeysaa marka ugu yaraan labo musharax ay u tartamaan.
  20. Madasha waxaa ay go’aamisay in 51 ergada u codeyneysa halkii kursi ee Golaha Shacabka ay dhammaantood goobjoog ku noqdaan xarunta doorashada ka dhaceyso si ay u codeeyaan.
  21. Haddii beesha kursiga leh ay tirada 51 ergo ay buuxin weydo, dib baa loo dhigayaa kursigaas, waxaana la siinayaa fursad ay ku soo dhammeystiraan tirada 51 ergo muddada doorashadu socoto,
  22. Haddii aysan buuxin tirada ergada 51 ee u codeyneysa kursiga xubinimada golaha shacabka muddada doorashadu socoto, kursigaas waa la laalayaa.
  23. Arrimaha Shabeelada Dhexe iyo Hiiraan;
  24. Madashu waxey xakuumadda Federaalka ah ku adkeyneysaa in la xaqiijiyo dhismaha maamulka gobollada Hiiraan iyo Shabeelaha Dhexe inta ka horreysa xilliga doorashada.
  25. Kuraasta Aqalka Sare ee Beelaha Somaaliland;

Madasha Madaxda Qaranka oo tix-galineysa go’aanadii kasoo baxay shirkii Baydhabo kuna saabsanaa xalinta Saami-qeybsiga iyo hannaanka doorashada xubnaha Aqalka Sare ee Somaliland iyo sidoo kale heshiiskii 12 Abriil 2016 doorashooyinka dadban ee 2016-ka & Hannaanka Dhismaha Aqalka Sare ee Baarlamaanka oo Qeexaysa “Maamul-goboleedyada hadda jira ama dhismaya Waxay Samaysanayaan qaab ay kuraasta ugu qaybiyaan Beelaha/Dadyowga ama Deegaanada, Qaabkaas oo ah mid isku dheel-itiran oo loo wada dhan yahay, iyadoo la hubinayo in dadka laga tirada badan yahay ay helaan metelaad ku filan”. Madashu waxay go’aamisay in qoondada 3-da kursi ay qoonda ahaan u leeyihiin beelaha Sool, Bariga Sanaag iyo Buuhoodle oo hal kursi ka mid ah ay leeyihiin beelaha laga tira badan yahay ee deggan degaannadaas.

Waxay sidoo kale Madashu Go’aamisay in laba Xubnood lagu Kordhiyo Tirada Kuraasta ay Qoonda ahaan beelaha Soomaaliland ku leeyihiin Aqalka Sare ee Baarlammaanka Federaalka.

Ugu dambeyn, Odayaasha dhaqanka ayaa loo xilsaaray in qaybinta kuraasta ay kasoo Wada-tashadaan meel-marinta kama Dambeysta ahna kusoo war-geliyaan xafiiska Madaxweynaha Federaalka Somalia, Xafiiska Guddoomiyaha

Baarlamaanka Federaalka Somalia iyo Xafiiska Ra’iisul Wasaaraha XF Somalia;

  1. Arrimaha Jadwelka Doorashada;

Madashu waxay ay ansaxiyeen jadwalkan wakhtiyeysan ee doorashada 2016ka ee ay soo gudbiyeen GFHDD:

  1. Doorashada xubnaha Aqalka Sare in ay dhacdo 25ka September
  2. Doorashada xubnaha Golaha Shacabka in ay dhacdo September 24-10ka Oktoobar
  3. In xildhibaanada la dhaariyo 20ka Oktoobar
  4. In la doorto Guddoonka Baarlamaanka 25ka Oktoobar
  5. Doorashada Madaxweynahana in ay dhacdo 30ka Oktoobar

MAHAD-CELIN; Madashu waxay u mahad-celineysaa Safiirrada idman ee haweenka Somaaliyeed oo runtii muujiyey howlkarnimo iyo in ay ka go’an tahay ka gun gaaridda qoondada haweenka ee 30%.

Madashu waxaa sidoo kale u mahad-celineyaan Guddiga Federaalka ee Hir-gelinta Doorashooyinka Dadban (GFHDD) Shaqadii Wanaagsanayd ee ay qabteen Muddadii yarayd ee ay jireen.

Ugu dambeyntii, Madashu waxay u Mahad-celineysaa beesha caalamka oo xilli walba la garab-taagan Taageero Dowladda Federaalka Somalia. Waxayna Madashu isku Raacday in kulanka Madasha ee soo socda lagu qabto Magaalada Muqdishu Bisha 07-da bisha Septembr ee 2016-ka.

Shirkii Madasha Qaranka.jpg1.jpgShirkii Madasha Qaranka.jpg3Shirkii Madasha Qaranka.jpg4SomaliSwiss       Muqdisho

SomaliSwiss@hotmail.com

Advertisements
%d bloggers like this: