Taliyaha cusub ee Ciidamada Booliiska Soomaaliya oo maanta si rasmi ah ula Wareegay Xilka taliska Booliska.

???????????????????????????????Taliyaha cusub ee ciidanka booliiska Somalia Jen. C/kariin Daahir Siciid (Saacid) oo toddobaad ka hor loo magacaabay Xilka taliska Booliska Soomaaliyeed. ayaa si rasmi ah maanta ula wareegay xilkiisa, waxaana xafladdii lagu wareejinayay xilka ka qayb galay ra’iisal wasaaraha Somalia, Cabdi Faarax Shirdoon (Saacid), guddoomiya maxkamadda sare, Avv. Caydiid Cabdullaahi Ilka-xanaf iyo wasiirka arrimaha guddaha iyo ammaanka Qaranka, C/kariin Xuseen Guuleed.

Ra’iisal wasaaraha Soomaaliya oo hadal kooban ka jeediyay xafladdii xil-wareejinta oo ka dhacday dugsiga tababarka booliiska ee Jen. Kaahiye wuxuu yiri: “Hoggaanka cusub ee aanu u magacownay ciidamada difaaca iyo ammaanka dalku wuxuu qayb weyn ka yahay dadaalka aan ugu jirno sugidda amniga iyo isbedelka cusub ee aan ku doonaynno inaan si buuxda ugu xasilinno dalka”.

Sidoo kale waxaa Xafladdaas lagu amaanay Taliyaha hore ee ciidanka booliiska, Jen. Sharif Shiikhunaa Maye, waxaana la sheegay inuu qeyb weyn ka qaatay dib-u-dhiska ciidanka oo muddadii uu taliyaha ahaa saddex jibaaray tirada ciidanka booliiska Somalia. Taliyaha oo munaasabaddii maanta ka hadlay ayaa sheegay in loo baahan yahay qorshe sare loogu qaadayo tayada iyo tirada ciidanka si loo gaarsiiyo howlaha ciidanka dalka oo dhan.

Jen. Maye oo isna halkaas ka hadlay wuxuu yiri: “Waxaan soo dhaweynayaa taliyaha cusub ee ciidanka booliiska, waxaana u rajeynayaa in Illaahay u fududeeyo xilka weyn ee uu qaaday, wuxuuna kula dar-daarmayaa inuu u hawlgallo kordhinta tirada ciidanka iyo sidii kor loogu qaadi lahaa tayadooda,” hase ahaatee Jen Maye wuxuu ku amaanay ciidanka sida ay naftooda ugu huraan sugidda ammaanka dalka iyo difaaca xuquuda shacbiga Soomaaliyeed.

Waxaa kaloo halkaas ka hadlay lWasiirka arrimaha guddaha iyo amniga Qaranka, C/kariin Xuseen Guuleed ayaa mahad gooni ah u soo jeediyay taliyihii hore ee booliiska Jen. Shariif Shiikhuna isagoo ku ammaanay wada-shaqeyntii ay lahaayeen lixdii bilood ee lasoo dhaafay. Waxayna ra’iisal wasaaraha iyo wasiirku goobtaas billad Sharaf ku guddoonsiiyeen Jen. Maye.

Dhanka kale Jen. Saacid ayaa noqday taliyihii 10-aad ee qabta jagada ugu sarreeysa ciidanka booliiska Soomaaliya tan iyo markii la aasaasay 1943-kii oo ahaa xiliggii uu dalku gumaysiga ku jiray. Waxaana goobta xil-wareejinta laga xusay in Jen. Saacid abaahii Daahir uu waqti dheer u soo shaqeeyay ciidanka booliiska Soomaaliyeed. Halka uu isna yaraan ku galay shaqada ciidanka illaa uu ka qabto hoggaanka ugu sarreeya ciidanka.

Taliyaha cusub oo munaasabadda ka hadlay wuxuu yiri:“Waxaan mudnaanta kowaad siinayaa daryeelka ciidanka iyo cadaalad inaan u sameeyo. Askariga aan ku aaminayno mas’uuliyada illaalinta sharciga iyo amniga waa inuu xaqiisa helo, si aan uga guul-gaarno la dagaalanka musuq-maasuqa iyo dambiyada abaabulan, una difaacno xuquuqda shacbigeenna”.

Ra’iisul wasaaraha Somalia ayaa hadalkii uu ka jeediyay munaasabadda xil-wareejinta wuxuu ku xusay taariikhda dheer ee ciidanka booliiska Somalia, iyo sida ay laf-dhabar ugu ahaayeen nidaamka dawligaa ee Soomaaliya. Isagoo sheegay inay lagama maar-maan tahay inay kaalintaas buuxiyaan sida ugu dhaqsaha badan.

Gabagabdii, Ra’iisul-wasaaruhu wuxuu kula dardaarmay taliyaha cuusb ee ciidanka booliiska Soomaaliya inuu la yimaado qorshe dhamaystiran oo lagu illaalinayo sharciga dalka, amniga iyo sharafta muwaadinka Soomaaliyeed.

SomaliSwiss        Muqdisho

SomaliSwiss@hotmail.com

%d bloggers like this: