Magaalada Muqdisho oo maanta laga Xusay Qaraxii ka dhacay Hotel Shaamow ee sannadkii hore.

December 2010
M	T	W	T	F	S	S
	1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31

Posted on December 3, 2010 by SomaliSwiss

Halkaan ka akhri

Maanta oo ah 03 Dec, 2010 waxaa magaalada Muqdisho laga xusay qaxaxii ka dhacay Hotel Shaamow Sanad ka hor oo ay ku dhinteen Arday, dhaqaatiir iyo wasiirro ka tirsan xukuumaddii hore ee Soomaaliya,balse mas’uuliyadda qaraxaas ay diideen xoogagga hubeysan ee dowladda kasoo horjeeda.

Sida la sheegay Qaraxaas waxaa fuliyay nin la rumeysan yahay inuu ka yimid dalk Denmark oo xiriir la leh kooxaha hubeysan, ayaa waxaa lagu dilay dad ka badan 30-qof oo ay k jiraan afar wasiir oo ka tirsan xukuumaddii iscasishay ee Cumar C/rashiid Cali Sharm’arke.

Qaraxa lala beegsaday dadkii isugu yimid Xaflad ay ku qalinjabinayeen arday wax ka bartay jaamacadda Banaadir, waxayna barteen cilmiyada kambiyuutarka, dhaqaalaha iyo arday barta cilmiga caafimaadka, kuwaasoo ahaa kuwii ugu badnaa ee ku dhintay qaraxa.

Waxaa ku dhintay qaraxaas dhaqaatiir uu ka mid yahay hormuudkii jaamacadda Banaadir Dr. Maxamed Aadan Warsame (Shahiid), waxaana dhaawacyo isugu jiray kuwo halis ah ay kasoo gaareen dhaqaatiir kale oo qaarkood weli ku jira isbitaallo ku yaalla dalka Saudi Arabia, Sidoo kale Qaraxaas waxaa ku dhintay wasiirkii waxbarashada Axmed C/llaahi Waayeen, wasiirkii hiddaha iyo tacliinta sare Ibraahim Xasan Caddow, wasiiraddii caafimaadka Qamar Aadan Cali iyo wasiirkii dhallinyarada iyo isboortiga Suleymaan Colaad Rooble oo u dhintay sannadkan horraantiisa dhaawac halis ah oo kasoo gaaray qaraxaas.

Hase yeeshee intaas oo keliya ma hayn dadka ku dhintay ee waxaa jiray suxufiyiin ku dhinteen waxaana ka mid ahaayeen: Maxamed Amiin Aadan Cabdulle oo u shaqeynayay idaacadda Shabeelle iyo Xasan Subeyn Xaaji Xasan oo isaguna ahaa sawirqaadihii telefishinka Al-Carabiya, iyadoo ay jireen suxufiyiin kale oo ku dhaawacmay

Sida runta ah qaraxaas wuxuu keenay murugo xooggan iyo qalbijab, wuxuuna dhaawac xooggan u geystay shacabka Soomaaliyeed ee ku kala nool daafaha Caalamka, dhammaan Soomaalida, gaar ahaan qurba joogtada, waxa mar qur ah uu dhiigooda dhaqaaqay markii ay arkeen dhibka soo gaaray bulshada Soomaaliyeed.

Madaxweynaha Dowladda KMG Soomaaliya Sheikh Shariif Sheikh Axmed iyo hoggaamiyaha ururka Xisbul Islaam Sheekh Xasan Daahir Aweys, ayaa si isku mid ah u cambaareeyay, iyadoo mas’uul walba uu ku sheegay qaraxaas inuu mid lagu dilay dadkii wax u tari lahaa Soomaaliya.

Sidoo kale Sheikh Shariif, wuxuu sheegay in qaraxaas uusan cabsi gelin doonin, ayna sii wadayaan howlahooda, isagoo sheegay in qaraxaas uusan ahayn midka keliya ee lala beegsaday xubno ka tirsan dowaldda, balse uu ka horreeya qarax ka dhacay Baladweyne oo lagu dilay 70-qof oo ay ku jireen wasiirkii amniga Qaranka Cumar Xaashi Aadan iyo Danjire C/kariin Laqanyo.

Madaxweyne Sheikh Shariif oo Khudbadii Salaadda Jimcaha Uga hadlay Qarixii Hotel Shamow oo maanta Sanad Ka Soo Wareegtey, wuxuuna xusay in dhacdadaas ay ahayd mid ay ku soo buraarugeen shacabka Soomaaliyeed meelkasta ay joogaan.

Dhanka kale Waalidiinta dhalay, ardaydii lagu dilay qaraxaas, ayaa iyaguna dareenkooda muujiya, iyado qaarkood ay sheegeen in lagu dilay qaraxaas caruurtooda oo ay dhibaato kusoo koriyeen waxna ku bareen, si ay u anfacaan naftooda, dadkooda, dalkooda iyo waalidiintood.

Waxaa Mas’uuliyiin kala duwan oo horay Soomaaliya xilal muhiim ah uga soo qabtay iyo shacab ku nool dalka dibadiisa ayaa iyaguna cambaareeyay qaraxaas, waxayna ku tilmaameen mid aan horay looga arag, laguna doonayo in lagu naafeeyo shacabka Soomaaliyeed, gaar ahaan kuwa waxbartay.

Si kasta ha ahaatee bannaanbaxyo, looga hojeedo qaraxaas khasaaraha badan geystay, ayaa ka dhacay inta badan dalka Soomaaliya iyo dibadda dalka, iyadoo la sameeyay hees loogu magacdaray QAYLO-DHAAN, taasoo erayadeedu ay ka mid ahaayeen magacyada dadkii lagu dilay qaraxyadii ka dhacay Soomaaliya.

SomaliSwiss Muqdisho

SomaliSwiss@hotmail.com