Gabay cusub Abwaan Inj. Maxamed C. Cibaar:- 300 oo habeen kaddib markii ay ciidamada gaashaanbuurta dulmiga soo galeen Muqdisho…

Muqdisho

Halkaan ka akhri

Halkaan ka dhageyso gabayga

Caawa oo ay taariikhda miilaaddigu tahay 23kii oktoobar 2007, tan hijriyaduna tahay 12kii shawaal 1428, Waa habeen xusuus gaar ah oo xanuun badan u leh umadda Soomaaliyeed ee Muslimiinta ah meel ay joogaanba. Waa habeen ay 300 oo habeen ka soo wareegtay habeenkii ay ciidamada gaashaanbuurta dulmiga oo ay hoggaaminayaan maamuladda Itoobiya iyo Mareykanku ay gudaha u galeen caasimadda Soomaali weyn ee Muqdisho, ayagoo u dabbaaldegaya qorshe dhagareed waqti dheer laga soo shaqeynayay oo howl iyo hanti fara badanba lagu bixiyay. 

Sidaan la wada soconno  cadowyadaas isi soo bahaystay oo adeegsanaya mujrimiin mannaxeyaal ah oo magac nala sheegtaa, waxay xasuuq baahsan, burburin iyo barakacin ka geysteen caasimadda, ayagoo ay ujeeddadoodu tahay ; Mas madaxaa laga dilaa, rajeynayana haddii ay gacanta ku dhigaan Muqdisho in dalka intiisa kalena ay toos ula wareegi doonaan oo Soomaalidu si sahlan oo dhibyar ay isku wada dhiibi doonto. 

Cadowga gumaadka u soo bareeray waxay ku talogaleen in ay tirtiraan shacbiga caasimadda ku nool, talo waa tii Allee. Waxaa la adeegsaday hub adduunyada ka mamnuuc ah oo ay fosfarka cadi ka mid tahay. Waxaa baadkii iyo biyihii loo diiday maatidii degaannadoodii laga qixiyay. Waxaa si ula kac ah loo gubay suuqyadii, masaajidyadii, dugsiyadii, isbitaalladii iyo meel kasta oo loogu adeegayay bulshada. Laakiin nasiibdarro dhacdooyinkaas aan qarsoomeynin oo muuqda, adduunyadu waxay uga jawaabtay aamus iyo in la abaalmariyo kuwii tacaddiyada dhacay ka mas’uulka ahaa oo deeq iyo darajaba lagu taageero.

Waxaa nasiibwanaag iyo wax Alle weyne lagu mahadiyo ah – walow aan la dhaliilo yareyn – in guud ahaan shacbiga Soomaaliyeed, gaar ahaanna kuwa Muqdisho ay beeneeyeen riyadii cadowga, ayna u diideen in uu dalkooda si raaxo leh ugu dakeeyo. Waxaa amaan, duco iyo dhiirrigeliba mudan halyeeyada harsiga iyo hoyaadka u diiday cadowga damaca waalan, kuna khasbay in ay habeen iyo maalin ay waqtigooda gabaabsiga sii ah gabasho ku dhameystaan, gabbalkoodu ha dumee!!. 

Anigoo haddaba umadda Soomaaliyeed u rajeyna guul degdeg ah, kulana dardaarmaya midnimo, dadaal iyo dulqaad, ayaan jeclahay inaan soo gudbiyo gabay cusub oo aan ku magacaabay Muqdisho. Gabaygu wuxuu ka hadlayaa marxaladihii ay soo martay magaaladu, maanta halka ay ku sugantahay iyo mustaqbalka loo rajeynayo hadduu Rabbi idmo. 

Gabayga Muqdisho, wuxuu ku bilaabmayaa: 

MUQDISHO: Gabay Cusub

  1. Mudaney magaaladaan jeclee maanku uu tabayo

  2. Ilaa miyi misbaax ifinayoo mugdi ka dhowraaya

  3. Muraayadda nalaga daawadiyo masraxii Soomaali

  4. Mahuraankii geyigeenna iyo maskaxdii baad tahaye

  5. Miliilicaada xiisaha leh iyo bilicda muuqaalka

  6. Munaasabadihii ciidihiyo ku dhex-mushaaxaada

  7. Markaan soo xusuustaan saqdhexe soo mirkacayaaye

  8. Maqsuud taan  ku noqon laa inaan mar uun ku noolaado

  9. Muxibbadana igu reebtayeen muhanayey hee dheh. 
     

  10. Anigoo aan marinkii san iyo garan midkii leexsan

  11. Malcaamadda haddii aanan tagin alifna ley meerin

  12. Oon murabbi kaaga ah i barin miinka iyo wowga

  13. Dugsi maamul wacan iyo haddaan Maajo la i geynin

  14. Mas’alooyin haddaan ley furfurin maangal iyo maangad

  15. Muftaaxii aqooneed haddaan la i mihiibsiinnin

  16. Cilmigana aan ley miisi layn mala-awaalkeyga

  17. Martabadda aan joogaa malaha maba niyaysteene

  18. Maax aan gureyn abidkeed iyo miid ayaad tahaye

  19. Madrasadii i soo ababisiyo macalliney hee dheh. 
     

  20. Inkastoon masaafaan dhoweyn meel fog kaa joogo

  21. Inkastoo maqaarkiyo lafuhu Yurub ku meereysan

  22. Miyirkeygu aduu kula jiraa maalin iyo layle

  23. Mixnad baas intaad ku sugantoy mashaqo kuu taallo

  24. Intey marrasta taada ah jiqaha meehannaabeyso

  25. Muluq hooyo laga dilay intey marwo ilmeyneyso. 
     

  26. Maxajabad daboolneyd intuu maraxu haabhaaban

  27. Mooryaan habaarani intey kugu marqaameyso

  28. Madiidinkuna kaa talinayiyo doqonka maangaab ah

  29. Maxbuusiin intey kugu yihiin tiro malaayiin ah

  30. Inaan ducada kuu mariyo iyo mintidid mooyaane

  31. Anigana macaan iima laha manfac la quutaaye

  32. Makaankii aan u hiloobay iyo minankayey hee dheh. 
     

  33. Hawadaada meeldhaxaadkaa iyo cimilo miisaaman

  34. Mowjadaha badweyntii Hindiya maanyo ku dalxiiska

  35. Mirihiyo khudaar noocba nooc mooska iyo liinta

  36. Mafafaayga beertiisa iyo wabiga kuu muuqda

  37. Xoolaha la soo maalayee manno laguu siiyay

  38. Macaamilada ganacsiga batiyo moodka la isdhaafsho

  39. Meheradaha kala jaad ahee laga mushaar qaato

  40. Oy  waliba mug shidaal leh iyo macdani kuu dheertay

  41. Waa wax aanan maab laga heleyn sidan maleeyaaye

  42. Macduunkaan nasiibka u hellneen mahadinney hee dheh. 
     

  43. Minnaaradaha kuu astaana iyo mowlacyada diinta

  44. Maqaamkaaga hodankiyo Ilaah magacu kuu yeelay

  45. Mannaxaanka ka masuugayee dabinka kuu miiqi

  46. Oo uu muraadkoodu yahay macsi tallaalkeeda

  47. Masjidkoo musqulo laga dhigtiyo majliska xaaraanta

  48. Kuwii kacbada ka maseyrayee maagay duminteeda

  49. Qoomkii maroodiga wataa lagu misaalaaye

  50. Ismaqiiqa ismiidaaminta ah iyo majnuunnimada

  51. Mayacadoodse wey eedayaan malaxdey dhuuqaane

  52. Meydadkooda iyagoo ka baqan iyo maxaabiista

  53. Oo sii mirqaayaadna arag muddo aan dheereyne

  54. Muqdishaay Mowlaad leedahaye samir ha moogaannin. 
     

  55. Marxaladba wixii kuu qaddaran waa maktuub qorane

  56. Maalmahan dhibka ku gaaray iyo mahadhadaan taagan

  57. Mashriq iyo maqribba xulufadaa miig ka soo kicisay

  58. Moortarka  shacabka dabarjariyo madfac daryaamaaya

  59. Madaariista ololeysa iyo musxafka deeboobay

  60. Mooraduugga muslinkaa la dhacay een mid lagu reebin

  61. Agoomaha milicdu shiilatee marin cidlaa daadsan. 
     

  62. Mashaa’iikhda Macbadyada dhexdood dhiiggu mulucleeyay

  63. Maqaawiirta la ugaarsadiyo Mu’addimiin dooxa

  64. Magantaada la xasuuqayee layska marinaayo

  65. Haddaad saaka u madluunsantood la musaraareyso

  66. Maka iyo hortaa waxa la gubay Muxamed (scw) hoygiise

  67. Baqdaad wuxuu Mangoolkii ku dhigay maqashay waagiiye

  68. Maantana saqiirrada Maqdis maafiyaa dubannoo

  69. Miijinta cunaha leys hayaa maaha kaligaaye

  70. Macbuud meeshii lagu caabudaba waa la mirayaaye

  71. Miinshaar afbadan iyo haddey maqas ku googoyso

  72. Muqdishaay Mowlaad leedahaye samir ha moogaannin. 
     

  73. Markuu qooqo aadmigu durbuu marinhabaabaaye

  74. Mad-habtiisa intii diidda oo maya tiraa beenta

  75. Macaash wuxuu ka raadraadiyaa maxasta laynteede

  76. Mu’minnimadan leysku diiddanyee laba mamnuucaayo

  77. Mareykanku xadgudubkuu wadiyo macangaggaa Bush ah

  78. Mashaariicda Abasiinya iyo mucatab sheegsheegga

  79. Munaafaqyada la adeegsadee malafsan laaluushka

  80. Oo murux iney kaa dhigaan lagu masruufaayo

  81. Mu’aamaradda lama mooga iyo waxay maleegaane

  82. Malaa’iga diyaaraa jiroon minit wax seegeyne

  83. Marar badan Quraankiyo siduu Sunnuhu noo muujin

  84. Ama ay maahmaahdeennu tiri murtida suugaantu

  85. Ma guuleysto mujrimkii gardaran moolna wuu liqiye

  86. Muqdishaay Mowlaad leedahaye samir ha moogaannin. 
     

  87. Waa meerto waayaha adduun midiba ceyn tahaye

  88. Muslinnimo waxaad daafacdood madal ka taageertay

  89. Wixii carabtan iska maahsan aad maslaxaddeed doontay

  90. Afrikada midee waxaad is tiri kalama maarmaane

  91. Waxaad dulmiga maareystay iyo midabtakoor diidday

  92. Mucaawino waxaad diri jirtiyo meseggo kuu keydsan. 
     

  93. Masaafurka ku soo magansadiyo waxaad miskiin kaashay

  94. Martisoorka sharafta leh waxaad ku marxabbeyneysay

  95. Mashaakilku maruu kugu dhaceed yara madoobaatay

  96. Muran iyo hadduu maloba galay mansabka aad joogto

  97. Meelkadhac haddaad la kulantood maacaleesh noqotay

  98. Iney kuu miciinaan kuwaad  midig ka dhowreysay

  99. Dummintaada haddey kaba mushtari maalna lagu siiyo

  100. Munaaqishada socotaana tahay masixiddaadiiba

  101. Taariikhda waxaad muujisaa kuu marqaati ahe

  102. Muqdishaay Mowlaad leedahaye samir ha moogaannin. 
     

  103. Mag qof aad ka filaneysay iyo mahad uu soo celiyo

  104. Manjaxaabo inuu kula damcaa waa mushkilad weyne

  105. Muufadaada  kuwii lagu korshiyo maraqa kuu gaar ah

  106. Sidaad maamadood tahay kuwaad moxogga soo saartay

  107. Kuwii dhiiggey kaa muudsadeen macashu xeyrowday

  108. Mijihii yaraa iyo markuu muruqu kuuskuusmay

  109. Adna muunaddaad beri laheyd cadowgu kaa meyray

  110. Muuqdisha haddey kugu dheheen maanla’aantooda

  111. Maqalkaagu hadduu cudur ku yahay oy mantagayaanba

  112. Oo inba lagugu maadsadiyo masabbid xaal joogo

  113. Maamuus anaa kuu hayood ii muhiim tahaye

  114. Muqdishaay Mowlaad leedahaye samir ha moogaannin. 
     

  115. Maaligga Raxmaankeenna ahi waxa uu maareeyo

  116. Sida kownkan loo maamuliyo malagyadow heellan

  117. Oo makhluuqa loo kala dabaro mucsjiso weeyaane

  118. Jiilaal musiibo ah abaar duunyadii maratay

  119. Macaluulna loo la’anayoo maafish yahay baadku

  120. Mahiigaan haddii uu curtoo carriga maansheeyo

  121. Geedihii mudhta ahaa durbey wada magoolaane

  122. Nafleydana waxaan mawdku helin malabsadaan quude

  123. Adna marti-u-rooneey haddaad ciil la murugootay

  124. Maalin baa insha-Allaahu iman aad mashxaraddaaye

  125. Mustacmarku suntuu kugu mudiyo miinaduu dhigayo

  126. Mariidkaa laguu qooshayee makastu fuuqeyso

  127. Musuqmaasuqiyo maalin buu maradku kaa tagiye

  128. Qabyaaladda marbaa midey tahaba leyska maaniciye

  129. Oo macangag lagu diimi iyo kaan mabda’ laheyne

  130. Muqdishaay Mowlaad leedahaye samir ha moogaannin. 
     

  131. Waxa bi’in mujtamacaagu waa mufsid shirqoolkiise

  132. Haddii aad makriga nacabka iyo macnaha aad fahamto

  133. Oo samaha aad maaggantahay Qaadir meelmariyo

  134. Haddii muqaddaskii lagugu dhaqo lagu midoobaayay

  135. Maxkamado caddaalada haddii muddaca loo aado

  136. Oo uu mas’uul daacadoo miiggan kaa taliyo

  137. Haddii uu muwaadinka dulmani helo mudnaantiisa

  138. Masaamaxuna faafoo macruuf leysku wada sheego

  139. Dadkaadii la kala moosi  jiroo wada mataanoobay

  140. Oo maqasha edeggeeda iyo mooro ka xoroobay

  141. Waa  guul mustaqbalkaagu iyo midnimo saafi ahe

  142. Maashaa- Allaahuye adoo mulkigaa weynaaday

  143. Maaliyad adoo qani ahoo masnac waxsoosaar  leh

  144. Maraakiibta adigoo dirsida qalab cirkaas meera

  145. Oo ciidan laga maago oo magag leh kuu joogo

  146. Mudullada Tigreygaa kibree Melles ka soo jeedo

  147. Maqalle iyo adigaa xukumi mandaqaddoo idile

  148. Muqdishaay Mowlaad leedahaye samir ha moogaannin. 
     

  149. Muqdishaay Mowlaad leedahaye samir ha moogaannin.

  150. Muqdishaay Mowlaad leedahaye samir ha moogaannin.

  151. Muqdishaay Mowlaad leedahaye samir ha moogaannin. 

—————————————————————–

                        DHAMAAD 


Inj. Maxamed C. Cibaar

Soomaali60@yahoo.com 

Gabayga Halkan ka dhegeyso

 

%d bloggers like this: