Muqdisho (SomaliSwiss) 26, February 2007
Golaha Maxaakimta Islaamiga Soomaaliyeed ayaa soo saaray Bayaan ay Shacabka Soomaaliyeed u jeedinayaan  bayaankaasi oo kala ah go’aamo iyo dardaaran.
Bayaankooda ayaa waxa ay kusheegeen Golaha Maxaakimta in ay aaminsan yihiin iyagu in soo ifbixidda Maxkamadaha Islaamiga ay aheyd hadiyad Allaah uu ugu talagalay Shacabka Soomaaliyeed taasi oo soo muujisay rajada shacabka oo aheyd in la iska iloobo dagaaladii dhex maray walaalahada Soomaaliyeed iyo sidoo kale in laga gudbo wax waliba Soomaali oo idilna ay ku qanacdo in ay wax dhisato.
Kadib arrimahaasi oo dhami waxaa kasoo ifbaxay Soomaaliya in la iska iloobay wax waliba sida dhicii, dilkii, dagaaladii iyo wax waliba oo horey u aafeeyay Shacabka Soomaaliyeed illaa ay gaartay in Kallimadda Alle ka noqoto Soomaaliya mid sareysa taasi oo cadowga ku beertay in ay weerar kusoo qaadaan.
Waxayna ku tilmaameen Arrintaasi Golaha Maxaakimta in uu sii dhiiragelinayo maahee in aysan marnaba ka hari doonin hawlaha ay Islaamka u hayeen Golaha Maxaakimta, waxayna ammaan u soo jeediyeen dhacdooyinka dalka kasocda oo ay kudhaqaaqayaan Shacabka Soomaaliyeed ee sharafta leh.
gWaxay Golaha Maxaakimta Bayaankoodii ay ku sheegeen in ay la qeybsanayaan Shacabka Dhibaatada cadowga uu kuhayo, sidoo kale waxa ay tacsi u direen Guud ahaan Qoysaskii ay kasoo tageen Shuhadadii Soomaaliyeed, waxayna si aad ah uga mahadceliyeen Beelaha kala duwan ee Soomaaliyeed ee ka qeyb qaatay guushii ay ka gaareen Golaha Maxaakimta Arrimaha Soomaaliya.
Sidoo kale Bayaankii ay soo saareen ayaa waxa ay ugu baaqeen shacabkii marka hore gacanta ka geystay fulinta Hawlaha Golaha Maxaakimta in aysan ka caajisin oo ay horey u sii wadaan inta dalka looga xureynatano kuwa kusoo duulay.
Waxay ka digeen dagaal dambe oo beeleed in uu dib uga qarxo Soomaaliya iyaga oo ka faa’ideysanaya intii ay Golaha Maxaakimta Shaqeynayeen sidii la isku kaashaday laguna iloobay waxyaabahaasi oo qibraddaasi ay iminkana sii isticmaalaan si aanu dagaal qabiil dambe dalka uga dhicin.
Bayaanka ayaa sidoo kale waxa ay uga digeen Shacabka in ay mar waliba ku baraarugsanaadaan Shirqoolada lala damacsan yahay uguna baaqay in mar walibana ay ishooda furnaato oo ay feejignaan dheeri ah muujiyaan.
Waxaan si cad shaaca uga qaadeynaa bay ku yiraahdeen bayaankooda in aan diyaar u nahay wada hadal waliba oo Soomaaliya u keenaya in Mugdiga uu galay uu kaga boxo.
Waxayna sidoo kale ku baraarujiyeen in Xukuumadda ay ugu baaqayaan in tawbadda ay furan tahay waqti waliba inta Saacadda qiyaamaha laga gaarayo.
Waxay sidoo kale ugu sii baaqeen in ay eegaan xurnimada ay dadkooda u baahan yihiin iyo midnimada iyo hoggaan dhab ah hana ogaato baa lagu yiri xukuumadda in sharafta maamulka uu kujiro sharafta muwaadinka iyo in kusii fadhinta kursiga uu yahay ammaano oo laga soo bixi karo ilaahay raalli ahaanshiyadiisa kadib in ay kaaga raalli noqdaan Muwaadiniinta Soomaaliyeed.
Ugu dambeyntii Bayaanka Golaha Maxaakimta oo aad u dheeraa ayaa waxa ay ammaan ugu soo jeediyeen Mujaahidiinta ka muqaawameyneysa Dalka Soomaaliya iyaga oo ku booriyay in ay ka ahaato daacadda Allaah taasi oo sharaf u ah Islaamka iyo Soomaalida, waxayna ka digeen in la shaqeynta Gumeysiga uu yahay halis taasina ay uga haboon tahay la shaqeynta Muqaawamada.
Waxay kusoo gabagabeeyeen Hadalkooda in dhiigga Muslimka ah la siiyo xurmadiisa isla markaana aanan lagu xadgudbin sharaftiisa iyo sidoo kale in la iska ilaaliyo in uu dhoco dagaal sokooye.
GOLAHA MAXAAKIMTA ISLAAMIGA SOOMAALIYEED.
25/02/2007
SomaliSwiss  Omar
Email Riix Halkaan |
